«С.Сейфуллин атындағы жалпы орта білім беретін мектебі» КММ-де «Ауылым-мақтанышым» атты өлкетану мұражай ашылғандығы туралы ақпарат

Мұражай – әр елдің тарихын, салт-дәстүрін, мәдениетін танытатын құндылық. Қазіргі таңда, ерекше орын алып отырған, оқушылардың қызығушылығын туғызған тарихи-өлкетану және көркемөнер мұражайлары. Бүгінгі таңда, көптеген мектептерде мұражайлар ашу игі істердің бірі болып табылуда. «Наурыз- Жаңа Күн» демекші наурыз мерекесі қарсаңында Шығыс Қазақстан облысы, Аякөз ауданы, Қопа ауылында орналасқан «С.Сейфуллин атындағы жалпы орта білім беретін мектебі» КММ-де де өскелең ұрпаққа рухани азық беретін, «Ауылым-мақтанышым» атты өлкетану мұражай ашылды.

Мұражайдың атауы «Ауылым – мақтанышым» деп аталып отырған себебі: біздің Қопа ауылынның 1963 жылы «Овцевод» савхозы ретінде құрылып бүгінгі таңдағы дамуы туралы сыр шертеді. Ауылымыздан шыққан ел ауызында жүрген, құрметке лайықты атақты азаматтарымыз көп. Мысалы, Ұлы Отан соғысында ерлігімен танылған аталарымыз, бірінің-ерлері, бірінің-аға-бауырлары, бірінің әпке-қарындастыры майданда болғанда ерен еңбегімен тылда демеу болған тұлғаларымыз бар. Сонымен қатар, мектебізді 37 жыл үздіксіз басқарып келген ардақты ұстаз Жетибаев Асқар атамыздың ерен еңбегін жас ұрпаққа дәріптеу және аулымыздан шыққан атақты спортшылар, білім және ғылым, кандидаттары мен профессорлар, денсаулық сақтау саласындағы білікті дәрігерлер, сот орындаушылар, тағы басқа азаматтар осы Қопа ауылында дүниеге келген.

Мұражай алты бөлімнен тұрады. Бірінші бөлім «Еңбек майталмандары» деп аталады. Ауылымызды көркейтуге атсалысқан савхоз директорлары мен ауыл әкімдерінен бастап шопандар, механизаторлардың суреттері орналасқан. Екінші бөлім «Ер есімі-ел есінде» деп аталады. Мұнда Ұлы Отан соғысының ардагерлерінің фотосуреттері мен құжаттары, медальдары орналасқан. Үшінші бөлім «РЕТРО» бұл бөлімде аты айтып тұрғандай ескіге көз салу, өткенді еске алу, яғни Кеңес заманындағы қазіргі қолданыстан алынып, түрленген заттардың жиынтығы орналасқан. Төртінші бөлім «Туған жерім- Тұңырым» қазіргі аулымыздың дамуына үлес қосып отырған жеке кәсіпкерлер мен шаруа қожалық басшыларына арналған. Бесінші бөлім «Алтын ұя- мектебім» мектебімізді көп жыл басқарған Асқар атамызбен мектеп ұстаздары және мектеп түлектері орналасқан. Алтыншы бөлім «Туған өлкем- қандай көркем» деп аталады. Бұл бөлім туған жердің табиғатына арналмақ.

Ал біздің мұражайды ашудағы мақсатымыз: осы ауылда туылып-өскен, мақтан тұтуға лайықты қасиетті тұлғалардың тағылымды өмірі жайлы қысқаша дерек беріп, өскелең ұрпаққа рухани азық бере отырып, отансүйгіштікке тәрбиелеу. Сонымен қатар, болашақта біздің мектебіміздің оқушылары, ауылымыздың жастары осы азаматтарға теңелуге тырысып, өздері үшін дұрыс бағдар белгілеуінің, еліктеуінің айшықты үлгісі болатынына қол жеткіземіз деген ойдамыз.

Мұражайдың ашылуына байланысты барлық санитарлық талаптарды сақтай отырып, мектепте салтанатты іс-шара өтті және ауылдан арнайы қонақтар шақырылды. Бірінші бөлімінде, іс-шараға келген қонақтарға және мұражайда есімдері құрметке лайықты тұлғаларға арнап, үлкен-кіші демей ауылдың талантты ұл-қыздары арнайы дайындалған бағдарлама бойынша ән-шашуы мен тамаша билерін тарту етті.

Ауыл әкімі Жетибаев Нұрлан Асқарұлы тарихи мұражайдың өскелең ұрпаққа үлкен рухани серпіліс туғызатынын және мемлекетіміздің жарқын болашағына бағытталған құнды құжатқа айналатынына ерекше назар аударды, салтанатты жиынға қатысып отырған көпшілікті наурыз мерекесімен құттықтап, өзінің жақсы тілегін білдірді.

Екінші бөлімде, арнайы құрылған бағдарлама бойынша, ашылған мұражайдың салтанатты түрде лентасын қию рәсімі болды. Бұл рәсімді арнайы қонақ болып отырған ауылымыздың ақсақалы, қамқоршылық кеңес және қоғамдық кеңес төрағасы Қажытай Ахметжанов атамыз бен ардагер ұстаз, ардақты ана Орынгүл апамыз тұсауын кесті. Батаны Рәзжан апамыз берді. Осы қуанышқа арнайы шашуды қонаққа келен әжелер шашты.

Осы мұражайдың негізгі идеясының авторы мектеп директоры Шарипова Маниса Аблқасымқызы болғандықтан, ішіндегі орналасқан әрбір бұрыштың құрылымымына жете мән берді. Өйткені, әрбір фотосуреттің, жазылған мәліметтің, қойылған кітаптардың ерекше мағынасы бар және белгілі бір мақсатты көздейді. Ауыл тарихы мен Мектеп тарихы. Құнды жәдігерлерді, танымдық фото-суреттерді, мәліметтерді жинақтауға С.Сейфуллин мектебінің ұжымы, ауылымыздың азаматтары атсалысты. Тарих пәнінің мұғалімі Ахмадиев Азамат ағамыз құнды жәдігерлер мен фото суреттердің жиналуына үлкен ықпал етіп, ақыл кеңесімен бөлісіп, мұражайдың ашылуына, ұйымдастырылуына белсене араласты. Сонымен қатар көркем еңбек пәнінің мұғалімі Садвакасова Салтанат мұғалімімізде осы жәдігерлерді орналастыруға белесене қаттысты.

Әрине, бұл мұражайдың жұмысы осымен тоқтамай жалғасады. Сырт жерлерде жүрген көптеген жерлестеріміз естіп- білген сәттен өздері құнды мәліметтермен бөлісіп, үлесін қосатынына сенімдіміз. Алдағы уақытта көптеген косымша мәліметтерді жинақтап толықтырамыз. Жылдар өткен сайын өскелең ұрпақ өз ауылының тарихын біліп, туылған жеріне құрметпен қарап, өзінің үлесін тигізеді деген ойдамын. Ал, ауылының мақтанышына айналатын азаматтарымыз көп болса, еліміздің болашагы зор болатынына күмәнім жоқ.